Page:Madeleine de Scudéry - Clélie, histoire romaine - Volume 02.pdf/246

Ce n’eſt pas que ce ſage Roy ne connuſt bien que la Princeſſe & Tarquin n’auoient nul rapport d’humeur enſemble, & que Tullie & le Prince d’Ameriole n’en auoient point auſſi : mais au lieu de ſonger à mettre le vertueux, auec la vertueuſe ; & l’ambitieux, auec l’ambitieuſe ; il croyoit au contraire que comme il ne faiſoit ces deux Mariages que par Politiques, & que pour empeſcher que ces Princes ne remüaſſent quelque choſe dans ſon Eſtat, il deuoit ſeparer d’intereſts, l’ambitieuſe de l’ambitieux : & il s’y reſolut d’autant pluſtoſt, qu’il ſçeut la conuerſation que ie vous ay racontée : car il connut par là quelle eſtoit l’humeur de Tarquin. Auſſi diſoit-il vn iour à vn ſenateur qui à la priere du Prince d’Ameriole s’oppoſoit à ſon deſſein, les raiſons qui le luy faiſoient auoir ; ſi Tarquin & Tullie eſtoient enſemble, diſoit ce