ce que ie voudray, & ie ſeray alors plus heureuſe que ſi i’eſtois attachée à la fortune de cét ambitieux Amant. En effet, le Prince d’Ameriole a ſans doute tout ce qu’il faut pour monter au Throſne : pourueû qu’on luy puiſſe ſeulement donner l’enuie d’y monter, ſans s’arreſter à tous les obſtacles que la iuſtice ordinaire ne voudroit pas qu’on entrepriſt de vaincre. Tullie raiſonnant donc ainſi, commença de flatter le Prince d’Ameriole, & de luy deſguiſer vne partie de ſes ſentimens : il demeura pourtant tres fidelle à la Princeſſe, qui luy conſerua auſſi ſon cœur tout entier : mais la fidellité qu’ils eurent l’vn pour l’autre ne ſeruit qu’à les rendre plus malheureux : car ils ſçeurent bien toſt que Seruius Tullus auoit abſolument reſolu que Tarquin eſpouſaſt la Princeſſe, & que le Prince ſon Frere eſpouſaſt Tullie.
Page:Madeleine de Scudéry - Clélie, histoire romaine - Volume 02.pdf/245
Cette page n’a pas encore été corrigée
