Page:Madeleine de Scudéry - Clélie, histoire romaine - Volume 02.pdf/244

plus auantageux de l’eſpouſer, que d’eſpouſer le Prince d’Ameriole. Car enfin, diſoit-elle dans la colere où elle eſtoit, Tarquin eſt ſans doute plus ambitieux que le Prince ſon Frere, il eſt plus entreprenant, & plus capable de paſſer par-deſſus toutes ſortes de conſiderations pour arriuer à la fin qu’il s’eſt propoſée : mais de l’humeur dont il eſt, il voudra choiſir luy meſme le chemin par où il voudra monter au Throſne, & il s’egarera peut-eſtre s’il le choiſit ſeul : car il eſt ſi violent, que ſelon toutes les apparences il ne ſçaura pas bien meſnager toutes les occaſions que la Fortune luy preſentera : où au contraire le Prince d’Ameriole eſt d’humeur plus douce, il eſt plus agreable au Peuple que Tarquin, ie pourroy eſtre Maiſtreſſe de ſon eſprit, ou par amour, ou par crainte : & quand ie ſeray en cét eſtat là, ie luy feray faire