Page:Madeleine de Scudéry - Clélie, histoire romaine - Volume 02.pdf/233

quelque rapport auec l’eſtat de la fortune de ces quatre Perſonnes, parce que Tarquin eſtoit amoureux de Tullie, & que ſon ambition vouloit pourtant qu’il eſpouſaſt pluſtoſt la Princeſſe ſa ſœur qu’elle ; & que d’ailleurs la Princeſſe aimoit le Prince d’Ameriole, & que l’ambition & la bien-ſeance vouloient qu’elle eſpouſaſt Tarquin ; chacun ayant vn intereſt caché à la choſe dont il s’agiſſoit, ils en parlerent volontiers, & en parlerent ſelon l’eſtat preſent de leur ame, pluſtoſt que ſelon leurs propres ſentimens. Car s’ils euſſent tous dit ce qu’ils penſoient, la Princeſſe euſt dit qu’il falloit ſacrifier ſon ambition à ſon amour : le Prince d’Ameriole euſt dit la meſme choſe : & la Princeſſe Tullie euſt dit qu’il falloit que l’amour cedaſt à l’ambition. Mais comme ſa propre ambition vouloit que Tarquin l’eſpouſaſt,