Page:Madeleine de Scudéry - Clélie, histoire romaine - Volume 02.pdf/232

quets, à entendre chanter des Oyſeaux, à ouïr le murmure d’vn Ruiſſeau, ou à des conuerſations ſans aucun obiet : & pour moy il n’en eſt pas de meſme, puis que ie m’ennuye bien ſouuent de tout ce qui vous diuertit. Comme la Princeſſe eſtoit accouſtumée à ſouffrir cent choſes fâcheuſes de ſon ambitieuſe ſœur, elle détourna cette conuerſation auec beaucoup d’adreſſe, de peur que Tullie ne luy en diſt plus qu’elle n’en vouloit entendre : car elle ſçauoit quelle eſtoit l’impetuoſité de ſon humeur. C’eſt pourquoy changeant inſenſiblement de diſcours, ils commencerent à parler des paſſions, & à examiner ſi l’amour eſtoit vne paſſion plus illuſtre que l’ambition : & s’il falloit, en cas qu’elles ſe trouuaſſent dans vn meſme cœur, qu’il y en euſt vne qui cedaſt à l’autre. De ſorte que comme cette queſtion auoit