Page:Madeleine de Scudéry - Clélie, histoire romaine - Volume 02.pdf/229

conuerſation des Gens qui plaiſent ; & il faut n’auoir iamais la liberté d’aller ſeule en nulle part. Les voyages nous ſont deffendus ; la ſolitude meſme eſt quelquefois mal expliquée : & nous ſommes tellement malheureuſes, que dés qu’on ne ſçait point de nous, on en penſe mal : & il faut qu’il y ait touſiours quelqu’vn qui puiſſe reſpondre de nos actions, ſi nous voulons qu’elles ne puiſſent pas eſtre mal interpretées. De ſorte que de la maniere dont le monde eſt eſtably, nous naiſſons auec des paſſions qu’il faut toutes enchaiſner : car il ne nous eſt pas permis de rien aimer ny de rien haïr. L’ambition nous eſt inutile, & l’obeïſſance ſeule eſt noſtre partage : iugez apres cela ſi ie n’ay pas raiſon de ſouhaiter plus toſt d’eſtre vn vaillant Soldat, que d’eſtre ce que ie ſuis : auſſi vous puis-ie aſſurer qu’il n’y a point de iour