Page:Madeleine de Scudéry - Clélie, histoire romaine - Volume 02.pdf/227

effet ſi l’on obſerue ſoigneuſement les hommes, & les femmes, aux lieux où leur education eſt preſque eſgalle, comme à la Campagne, vous trouuerez qu’il paroiſt beaucoup plus d’eſprit aux femmes qu’aux hommes, & qu’il faut de neceſſité conclurre que la Nature vous a plus donné qu’à nous. Ie tombe d’accord, repliqua Tullie, que ce que vous dittes eſt vray : & qu’à parler en general nous auons & beaucoup d’imagination, & beaucoup d’eſprit : mais il faut en meſme temps conclurre que nous n’auons guere de cœur, de nous contenter d’eſtre ſeulement les premieres Eſclaues de toutes les Familles, & meſme bien ſouuent les plus malheureuſes & les plus mal traittées. Nous n’auons pas meſme la liberté de choiſir nos Maiſtres, puis qu’on nous marie bien ſouuent contre noſtre inclination : & il ſe