Page:Madeleine de Scudéry - Clélie, histoire romaine - Volume 02.pdf/220

De ſorte que comme on auoit reçeu deux Veſtales à la fois on ne parloit alors d’autre choſe : ſi bien que les deux Princeſſes ſuiuant leurs differentes inclinations s’entretinrent de cette Ceremonie. Pour moy, diſoit la Princeſſe Tullie, ie trouue que puis qu’on veut qu’il y ait des Veſtales, on a fort ſagement eſtably de les prendre au deſſous de dix ans, & deuant que la raiſon leur ſoit venuë : car malgré tous les Priuileges dont elles iouïſſent, & tous les honneurs qu’on leur rend, il n’eſt preſques rien que ie n’aimaſſe mieux eſtre que d’eſtre Veſtale. En mon particulier dit alors la Princeſſe, ie ne ſuis pas de voſtre ſentiment, car ie trouue quelque choſe de ſi beau, & de ſi noble à la fonction des Veſtales, que ie n’en voy iamais que ie ne leur porte enuie. En effet, adiouſta-t’elle, ce n’eſt preſques qu’en leur Perſonne