Page:Madeleine de Scudéry - Clélie, histoire romaine - Volume 02.pdf/219

nous apellons Lotos, deſtiné à cét vſage : & en ſuitte on luy donne l’habit de Veſtale, c’eſt à dire vne grande Coiffure longue & haute, d’où pendent negligemment diuerſes bandelettes : & puis on luy met ſur la teſte vne eſpece de voile que les Veſtales portent quand elles ſacrifient, & qui s’attache ſous leur Gorge, auec vne Agraffe de pierreries. Pour leurs Robes elles ſont blanches, pliſſées, & d’vne forme agreable : & par-deſſus elles ont vne grande Mante de Pourpre qui rend leur habillement fort beau & fort noble. Si bien que comme cét Habit leur eſt donné auec beaucoup de ceremonie & d’obſeruations, il y a touſiours beaucoup de preſſe à les voir : car lors que la Veſtale eſt vne fois dans le Temple de veſta, on ne voit plus ce qui s’y paſſe, car elles ont ſeules le priuilege d’y entrer, à la reſerue du Pontife.