Page:Madeleine de Scudéry - Clélie, histoire romaine - Volume 02.pdf/216

quelque inclination naturelle pour l’Ambitieuſe. Neantmoins comme il eſtoit l’aiſné, & qu’elle n’eſtoit pas l’aiſnée, & qu’il remarquoit que le Roy aimoit mieux la Princeſſe, que la Princeſſe Tullie, il contraignit aiſément ſon inclination. Mais au contraire la Princeſſe Tullie, comprenant qu’il luy ſeroit plus auantageux d’eſpouſer Tarquin, que le Prince d’Ameriole, parce qu’il eſtoit l’aiſné, & qu’il eſtoit plus ambitieux que ſon Frere, faiſoit ce qu’elle pouuoit pour ſe l’aquerir. Cependant le Prince d’Ameriole & la Princeſſe, ayant vne grande conformité d’humeur, ſçeurent qu’ils s’aimoient ſans ſe le dire, & ils eurent vne ſi violente inclination l’vn pour l’autre, qu’ils ne ſe la purent cacher. En effet leurs ſentimens eſtoient touſiours ſi conformes, qu’on ne les voyoit iamais eſtre d’auis differens : & au contrai-