Page:Madeleine de Scudéry - Clélie, histoire romaine - Volume 02.pdf/215

ſur ce Mariage, Tarquin & le Prince ſon Frere, auoient touſiours eu vne fort grande familiarité auec les deux ieunes Princeſſes : car la Reine qui eſtoit fille de Tanaquil auoit ſi cherement aimé le premier des Tarquins qui eſtoit ſon Pere, qu’elle auoit pris vn ſoin particulier, de faire en ſorte que les deux ieunes Tullies veſcuſſent bien auec ces deux Princes qui eſtoient de la meſme Maiſon. Mais comme il y auoit vn grand raport d’humeur entre Tarquin & la Princeſſe Tullie, & qu’il y en auoit auſſi beaucoup entre la Princeſſe, & le Frere de Tarquin (qu’on apelloit le Prince d’Ameriole parce qu’il auoit conſerué cette Ville en deſcouurant vne coniuration qui s’y eſtoit faite, & qu’il luy auoit eſté permis de porter ce nom là) il ſe trouuoit que le vertueux aimoit la vertueuſe ; & que l’Ambitieux auoit