luy faire ſçauoir : c’eſt pourquoy il faut s’il vous plaiſt laiſſer la choſe au hazard : car peut-eſtre quand ie le verray, luy diray-ie ce que ie ne croy pas eſtre capable de luy dire. Et en effet Madame, deux iours apres cette conuerſation, quoy que le Prince de Numidie fuſt beaucoup plus faible & plus incommodé qu’Aronce, il vint à ſa Chambre luy rendre vne viſite : & il y vint ſi inopinément, que perſonne ne ſçachant qu’il y deuſt aller, il trouua Aronce ſeul, car i’eſtois alors auec la Princeſſe des Leontins, & auec Aurelie. Vous pouuez vous imaginer aiſément, quelle fut la ſurpriſe d’Aronce : il le reçeut pourtant ciuilement : mais il ne reſpondit pas auec ſa franchiſe ordinaire, aux careſſes que le Prince de Numidie luy fit. Il voulut toutefois commencer de le remercier de la peine qu’il prenoit de le venir voir :
Page:Madeleine de Scudéry - Clélie, histoire romaine - Volume 02.pdf/21
Le texte de cette page a été corrigé et est conforme au fac-similé.
