Page:Madeleine de Scudéry - Clélie, histoire romaine - Volume 02.pdf/206

ſon retour à Rome, il fit vne action qui merite des loüanges immortelles. Car enfin ayant ſçeu que ceux qui portoient enuie à la grandeur de ſa fortune, diſoient qu’il n’auoit eſté eſleu que par les Patriciens, & que le Peuple ne luy auoit point donné ſon ſuffrage ; il ſe reſolut, quoy qu’il iouïſt de la Souueraine Puiſſance, & quoy que ceux qui tenoient de ſemblables diſcours ne fuſſent pas en eſtat de luy nuire, de ſe démettre de l’authorité. En effet il declara publiquement, qu’il ne vouloit point ſe preualoir de l’eſlection des Patriciens : & que ſi le Peuple ne vouloit plus qu’il regnaſt, il eſtoit preſt de quiter la Couronne. Mais à dire la verité, on peut aſſeurer qu’en deſcendant du Throſne de cette ſorte, il l’eſleua d’vn Degré : & qu’en ſe ſoumettant à quiter la Couronne, il l’affermit ſur ſa teſte. Car comme tous les Peuples