Page:Madeleine de Scudéry - Clélie, histoire romaine - Volume 02.pdf/205

uoient fait aſſaſſiner le ſucceſſeur de leur Pere, ſe retirerent à Pometie : car comme ceux qu’ils auoient employez à ce crime eſtoient pris, & qu’ils voyoient la puiſſance de Seruius Tullus puiſſamment eſtablie ils ne virent point d’autre Party à prendre. Et en effet Tullus ayant tous les Patriciens pour luy, fut declaré Roy, ſans qu’on s’amuſaſt à prendre les ſuffrages du Peuple. Il eſt vray qu’il eſtoit en vne ſi grande eſtime, & qu’il eſtoit ſi aimé de tout le monde, que cette Ceremonie euſt eſté inutile. Ainſi Tullus monta au Throſne : & y monta auec tant de gloire, que nul de ſes Predeceſſeurs n’en auoit tant eu : car enfin tout le monde tomboit d’accord qu’il auoit toutes les vertus, & qu’il n’auoit aucun vice. Il eut meſme le bonheur de faire la Guerre auec auantage : car il gagna vne fameuſe Bataille contre les Veientins : mais à