Page:Madeleine de Scudéry - Clélie, histoire romaine - Volume 02.pdf/203

nant que ce que Tanaquil luy auoit dit de cette Aigle qu’il auoit veuë en entrant à Rome, luy eſtoit poſitiuement arriué, il la creût encore cette ſeconde fois comme la premiere : & il prit vn ſi grand ſoin de bien faire eſleuer le ieune Seruius Tullus, qu’il deuint en effet ſi admirable en toutes choſes, que le Roy luy donna ſa Fille en Mariage. Mais apres cela les Fils du Predeceſſeur de Lucius Tarquinius, qui pretendoient qu’il les auoit empeſchez de Regner, eſtant fort irritez de preuoir que Seruius Tullus regneroit encore à leur preiudice, ſe reſolurent de ſe vanger de celuy dont ils penſoient auoir reçeu l’iniure. Et en effet ils le firent aſſaſſiner, par de pretendus Paſteurs qui ſur le pretexte d’aller demander iuſtice au Roy, le tuerent dans ſon propre Palais. Mais comme ceux qui firent cét aſſaſſinat s’enfuirent apres l’auoir