Page:Madeleine de Scudéry - Clélie, histoire romaine - Volume 02.pdf/202

condition, & les autres non, qui fut miſe au ſeruice de Tanaquil : & qui eſtant groſſe accoucha dans ſon Palais : car comme elle eſtoit belle, adroite ; & vertueuſe, Tanaquil l’aimoit, & en prenoit ſoin : de ſorte qu’eſtant accouchée d’vn Fils, il fut eſleué dans ce Palais : où l’on dit qu’vn iour cét Enfant, qui s’apelloit Seruius Tullus, eut la Teſte toute enuironnée de Flames durant qu’il dormoit : ſi bien que ce prodige ayant fait vn grand bruit le Roy fut où l’on le pouuoit voir, & où Tanaquil eſtoit deſia : qui empeſcha qu’on ne iettaſt de l’eau pour eſteindre cette flame, & qui aſſura au Roy ſon Mary, ſuiuant la connoiſſance qu’elle auoit des preſages heureux ou malheureux, que cét Enfant ſeroit vn iour la lumiere de l’Eſtat, et le plus grand ſupport de la Famille Royale. Si bien que le Roy ſe ſouue-