Page:Madeleine de Scudéry - Clélie, histoire romaine - Volume 02.pdf/201

prit Cornicule, Ficulnée, Camerie, Cruſtumerie, Ameriole, Medulie, & Nomente. Apres quoy il s’occupa à faire des Edifices publics d’vne eternelle mémoire : & il le fit principalement pour empeſcher le Peuple d’eſtre oiſif durant la Paix. Ainſi apres pluſieurs choſes qu’il fit pour la commodité ou pour l’embelliſſement de la Ville, il ietta les Fondemens du Temple de Iupiter qui eſt dans le Capitole, afin d’accomplir vn vœu qu’il auoit fait durant la Guerre Sabine. Mais auant que de vous dire ſa mort, il faut que vous ſçachiez encore diuerſes choſes, pour vous faire plus haïr Tarquin le Superbe, quand ie vous raconteray ſa vie, & que ie vous aprendray tous ſes crimes. Sçachez donc qu’à la priſe de Cornicule, il y eut parmy les Captiues vne Femme (dont le Mary mourut à ce ſiege) que les vns diſent auoir eſté de fort bonne