Page:Madeleine de Scudéry - Clélie, histoire romaine - Volume 02.pdf/20

touſiours, qu’il a deſſein de la chercher par toute la Terre, de l’arracher d’entre les bras d’Horace, & de ne la ceder à perſonne ! Quoy Celere vous voudriez que i’allaſſe ſouffrir que vous l’eſloignaſſiez de moy par vn faux aduis, & que vous l’aprochaſſiez peut-eſtre de Clelie ! car puis que nous ne ſçauons où elle eſt, qui vous a dit que vous ne l’enuoyeriez pas du coſté où il la pourroit trouuer ? Non non Celere, adiouſta-t’il, i’ay bien des ſentimens plus bizarres : car encore qu’il y ait des inſtans où ie voudrais ne voir iamais le Prince de Numidie, puis qu’il eſt mon Riual ; ie ne laiſſe pas de ne vouloir point le perdre de veuë, iuſques à ce que ie ſçache où eſt Clelie. Cependant i’ay vne repugnance horrible à luy deſguiſer mes ſentimens ; & ie ne ſçay pourtant ny comment les luy dire, ny meſme s’il eſt à propos de les