Page:Madeleine de Scudéry - Clélie, histoire romaine - Volume 02.pdf/199

que ſe ſeruant de cette fauorable conioncture pour ſatiſfaire ſon ambition, il brigua ouuertement la Couronne dés qu’Ancus fut mort : remontrant qu’encore qu’il fuſt Eſtranger, ce ne luy deuoit pas eſtre vn obſtacle, puis que Tatius & Numa auoient eſté tels, & n’auoient pas laiſſé de Regner. Mais afin que ſon deſſein reüſſiſt mieux, le iour que le Peuple deuoit eſlire vn Roy, il enuoya à la Chaſſe les ieunes Princes dont il eſtoit Tuteur : de peur que leur preſence ne fiſt ſouuenir les Romains des grandes qualitez de leur Pere, & qu’ils n’en eſleuſſent quelqu’vn des deux. Comme en effet l’opinion commune eſt, que ſans cét artifice Lucumon n’euſt pas eſté Roy comme il le fut. Il eſt vray qu’il le fut glorieuſement : car il ne fit que de grandes choſes depuis qu’il fut eſleû. Ses plaiſirs meſme furent