Page:Madeleine de Scudéry - Clélie, histoire romaine - Volume 02.pdf/198

il quitta le nom de Lucumon qu’il portoit : parce que c’eſt noſtre couſtume d’auoir deux noms, dont le premier nous eſt particulier, & le ſecond eſt celuy de noſtre Famille. Ainſi il prit le nom de Lucius, pour ſon premier nom & de la ville de Tarquinie dont il eſtoit, il fit celuy de Tarquinius, qui luy demeura, & à toute la Famille. Si bien qu’il ſe fit nommer Lucius Tarquinius, & ne ſe nomma plus Lucumon comme auparauant. De plus, il eſtoit doux, ciuil, & populaire : il cherchoit ſoigneuſement les occaſions de donner du plaiſir aux autres, afin de ſe les aquerir : & il aquit enfin vn tel credit durant le Regne d’Ancus, que ce Prince ne deliberoit rien ſans luy. Il eſtoit auſſi tres puiſſant dans le ſenat : & il eſtoit fort aimé du Peuple. Le Roy le laiſſa meſme Tuteur de ſes Enfans par ſon Teſtament. De ſorte