Page:Madeleine de Scudéry - Clélie, histoire romaine - Volume 02.pdf/197

luy prendre vne eſpece de Chapeau qu’il auoit, ſelon la couſtume des Toſcans : & qui apres l’auoir porté iuſques aux Nuës, vint le luy remettre ſur la teſte. Mais ie vous diray que comme Tanaquil eſtoit Toſcane, & qu’elle eſtoit tres ſçauante en augures, elle eut vne ſi grande ioye de cét heureux preſage, & qu’elle s’aſſura tellement qu’il ſeroit ſuiuy de fauorables effets, qu’elle dit à ſon Mary en l’embraſſant, qu’il n’eſtoit point de grandeur ſi eſleuée qu’il ne deuſt eſperer apres ce qui luy venoit d’arriuer. De ſorte que Lucumon laiſſant flatter ſon ambition par vne ſi douce eſperance, entra dans Rome : où il ne fut pas pluſtoſt, qu’il fut trouuer le Roy, & luy offrit & ſa perſonne, & ſon bien, pour le ſeruice de l’Eſtat : & en effet il deſpenſa beaucoup à la Guerre en diuerſes occaſions. Et pour s’accommoder tout à fait à l’vſage de Rome,