Page:Madeleine de Scudéry - Clélie, histoire romaine - Volume 02.pdf/195

vous parler du cinquieſme Roy de Rome, il n’en eſt pas de meſme : puis que ſi celuy-là n’en euſt pas eſté Roy, Tarquin qui Regne auiourd’huy n’en ſeroit pas le Tyran. C’eſt pourquoy il faut que ie vous parle vn peu plus au long du premier des Tarquins : auſſi bien comme il eſtoit Grec d’origine, & que l’ambition qui luy fit faire beaucoup de belles choſes, eſt la meſme paſſion qui a fait faire tant de crimes à ſon Succeſſeur, ie trouue qu’il y a diuerſes raiſons qui veulent que ie vous en parle vn peu dauantage. Vous ſçaurez donc, qu’vn homme apellé Demarathe, de la ville de Corinthe, ayant eſté contraint de quiter ſa Patrie, à cauſe qu’elle eſtoit diuiſée, & que le Party dont il eſtoit s’eſtoit trouué le plus foible ; vint s’habituer à vne ville apellée Tarquinie, où il ſe maria : & où il eut vn Fils qui ſe nommoit Lucumon ;