Page:Madeleine de Scudéry - Clélie, histoire romaine - Volume 02.pdf/191

Guerre auoit introduits ; qu’à enſeigner la vertu ; qu’à faire aimer la Paix ; qu’à faire baſtir des Temples ; qu’à rendre la iuſtice aux hommes ; & qu’à faire reſpecter les Dieux. Ce fut luy qui mit à Rome les veſtales dont l’inſtitution eſtoit deſia à Albe : ce fut luy qui inſtitua les Preſtres Saliens, & toutes leurs Ceremonies : ce fut luy qui regla les Mois ; ce fut luy qui fit baſtir ce celebre Temple de Ianus, qui eſt touſiours ouuert durant la Guerre, & qui eſt touſiours fermé durant la Paix : & ce fut luy enfin qui pour teſmoigner l’amour qu’il auoit pour les Sciences & pour les Arts, conſacra vn petit Bocage aux Muſes, où il ſe retiroit ſouuent ſeul. Auſſi diſoit-on alors, que c’eſtoit là qu’vne Nimphe nommée Egerie, venoit luy inſpirer toutes les choſes qu’il faiſoit. Mais apres qu’vne Paix de quarante-trois ans, eut don-