Page:Madeleine de Scudéry - Clélie, histoire romaine - Volume 02.pdf/189

mulus luy eſtoit apparu montant au Ciel : & qu’il les aſſuroit que leur ville ſeroit Maiſtreſſe de toute la Terre. De ſorte que l’immortalité de Romulus, & cét heureux preſage, adouciſſant le Peuple, on ne ſongea plus qu’à luy rendre des honneurs tels qu’on les rend aux Dieux. Voila donc, Artemidore, quelle fut la naiſſance de Rome, & quel fut ſon premier Roy : qui eſtoit ſans doute vaillant & ferme, & tel qu’il le faut pour eſtablir vn Empire. Pour moy ie ſuis tellement eſpouuanté, quand ie conſidere que ce meſme Peuple qui n’a iamais eſté commandé que par de vaillans, de ſages, & de vertueux Rois, peut ſouffrir la domination d’vn Tyran, que ie ne puis preſques le conceuoir. C’eſt pourquoy pour vous amener dans mon ſentiment, autant que pour contenter voſtre curioſité, ie veux bien vous dire quel-