Page:Madeleine de Scudéry - Clélie, histoire romaine - Volume 02.pdf/188

temps. Qu’en ſuite la Guerre des Fidenates commença ; que celle des veientins la ſuiuit ; & qu’en l’vne & en l’autre Romulus aquit vne gloire immortelle. Mais enfin apres auoir puny l’iniuſtice faite à ſa Mere ; apres auoir baſty vne fameuſe ville ; apres auoir eſtably diuerſes Loix ; apres auoir fait pluſieurs Guerres glorieuſement, tué des Rois, triomphé ſolemnellement, & donné la Paix à ſes Peuples, il ceſſa de regner en ceſſant de viure. Les vns ont creû que les cent Senateurs qu’il auoit eſtablis le firent aſſaſſiner pour regner : & les autres ont dit qu’il n’auoit fait que diſparoiſtre : mais l’opinion de ceux qui ne ſuiuent pas les ſentimens du vulgaire aueuglément, eſt qu’il y eut vn homme nommé Proculus qui voyant que le Peuple vouloit ſe ietter ſur ces Senateurs, leur vint dire pour les appaiſer que Ro-