Page:Madeleine de Scudéry - Clélie, histoire romaine - Volume 02.pdf/186

apartenoit. Apres cela ils firent la Paix auec Numitor, Frere de celuy qu’ils auoient tué : & le laiſſant en repos dans ſon Eſtat, il leur prit enuie de baſtir la fameuſe ville de Rome que Tarquin veut détruire auiourd’huy, & de la baſtir au meſme lieu où ils auoient eſté expoſez, & où l’on les auoit trouuez : & en effet ces deux Freres commencerent de la baſtir au dix-huictieſme an de leur âge, & le vingt-unieſme d’Auril. Mais enfin, genereux Artemidore, comme ie preſupoſe que vous ſçauez que le deſir de Regner les diuiſa, & que la mort de l’vn eſtablit le Throſne de l’autre, ie ne vous le diray pas. Mais ie vous diray ſeulement qu’en fort peu de temps la nouuelle Ville à qui Romulus donna ſon nom, fut auſſi puiſſante que les plus anciennes de celles qui l’euironnoient. Ce qui la peupla en ſi peu de temps, fut que Romulus eſtablit vn Aſile inuiolable,