Page:Madeleine de Scudéry - Clélie, histoire romaine - Volume 02.pdf/178

iroit pour ſçauoir preciſément ſi ce Prince auoit effectiuement deſſein d’aſſieger Ardée : & dans ce meſme temps, Aronce enuoya à cette ville vn Eſclaue qu’il auoit, qui eſtoit tres adroit & tres fidelle, & qui connoiſſoit Clelie, afin de ſçauoir ſi elle y eſtoit encore : car il craignoit de prendre quelque reſolution qui l’eſloignaſt de cette Perſonne, au lieu de l’en aprocher, s’il la prenoit ſans eſtre bien aſſuré ſi elle eſtoit en ce lieu là. De ſorte qu’Aronce, Artemidore, Zenocrate, Amilcar, & Herminius, demeurerent en attendant en cette Ville, où l’on ne parloit que de la puiſſance de Tarquin, de ſa violence, & de ſes iniuſtices. Mais comment eſt-il poſſible, diſoit Artemidore, que ce Prince ſoit tel que la Renommée le dit, veû qu’il paroiſt auoir quelque reſpect pour les Dieux ? car enfin, on l’a veû enuoyer deux