Page:Madeleine de Scudéry - Clélie, histoire romaine - Volume 02.pdf/175

tint ces illuſtres Grecs : car il ſçauoit bien leur Langue. Pour Aronce, comme il eſtoit le plus obligeant de tous les hommes, & qu’il ſçauoit que tout le monde aime mieux raconter ſes auantures, que d’eſcouter celles des autres, il s’informa obligeamment de l’eſtat de la fortune de ces deux Amis : mais ils ne voulurent pas contenter ſa curioſité, qu’il n’euſt ſatiſfait celle qu’ils auoient de ſçauoir ce qui l’obligeoit à quiter Cluſium, & à voyager en l’eſtat où ils le trouuoient : car ils auoient ſçeu par Clelius qu’il eſtoit Fils de Porſenna, & ils auoient apris en chemin qu’il auoit eſté reconnu pour tel : de ſorte qu’il leur aprit auec le moins de paroles qu’il pût, tout ce qui luy eſtoit arriué depuis ſon départ de Capouë : car Amilcar le deliura de la peine de luy dire ce qui luy eſtoit aduenu depuis qu’il eſtoit party de Carthage,