Page:Madeleine de Scudéry - Clélie, histoire romaine - Volume 02.pdf/174

qu’il vous plaira. Vous le pouuez meſme faire, adiouſta Herminius en ſouriant, ſans en auoir grande obligation à l’incomparable Amilcar : car de l’humeur dont il eſt, il ſe trouue ſi bien par tout, qu’on peut dire qu’il fait luy ſeul toute ſa felicité. Apres cela Aronce demanda des nouuelles du Prince de Carthage : en ſuite dequoy remontant tous à cheual, ils furent à ce petit Village, où Amilcar, Herminius, & ces aimables Grecs qui eſtoient auec eux auoient couché : mais quoy que Celere l’euſt propoſé à Aronce pour l’obliger à ſe repoſer, il ne le fit pas : car outre qu’en l’eſtat où eſtoit alors ſon ame, il n’euſt pû dormir iuſques à ce qu’il fuſt plus loin de Cluſium, il fut auſſi bien aiſe d’entretenir Amilcar & Herminius en particulier, durant que leurs Cheuaux repaiſſoient. Pendant quoy, Celere qu’Amilcar auoit tendrement embraſſé, entre-