Page:Madeleine de Scudéry - Clélie, histoire romaine - Volume 02.pdf/168

Vers, que le nom de Barcé, & le ſon de la voix de celuy qui chantoit, ne luy eſtant pas inconnus ; ha Celere, luy dit-il, ie ſuis le plus trompé de tous les hommes, ſi celuy qui chante n’eſt Amilcar : du moins ſçay-ie bien qu’il a fait la Chanſon que i’entens. Comme Celere n’auoit pas ſi bien entendu qu’Aronce, parce qu’il auoit parlé au Guide qui les conduiſoit, il ne le creût pas : & luy dit qu’il n’y auoit pas grande apparence que ce pûſt eſtre luy. Mais à peine eut-il dit cela, que doublant la pointe de la Coline, il vit non ſeulement Amilcar, mais Herminius : de ſorte qu’eſtant tous eſgallement ſurpris, & eſgallement aiſes de ſe rencontrer, ils deſcendirent de cheual en meſme temps : car Aronce ne voulut pas alors faire le Fils de Roy : ni eſtre connu pour tel par ces Eſtrangers. Ioint qu’il diſoit toûiours, quand l’occaſion s’en preſenteroit qu’en certaines rencontres l’a-