à vouloir eſtre trop prudent, ſuiuit le chemin qu’il tenoit : mais à peine eut-il fait cent pas qu’il entendit qu’il y auoit vn de ces hommes qui chantoit, & qui chantoit meſme fort agreablement. Helas, dit-il à Celere, celuy que nous allons rencontrer n’eſt pas amoureux, ou s’il l’eſt il eſt plus heureux que moy. Cependant en aprochant dauantage, il le voyoit moins, quoy qu’il l’entendiſt mieux : parce que le chemin tournoyant en cét endroit, la pointe de la Coline le luy cachoit, quoy qu’il en fuſt plus proche : ſi bien qu’entendant diſtinctement ce que chantoit cét homme, il ouït que la fin du Couplet de Chanſon qu’il chantoit alors finiſſoit par ces Vers.
Si Deliſe eſt infidelle,
Barcé l’eſt auſſi bien qu’elle.
Mais à peine eut-il entendu ces
