Page:Madeleine de Scudéry - Clélie, histoire romaine - Volume 02.pdf/166

qu’ils y diront des choſes qui aprendront la route que ie tiens, à ceux que ie ne veux pas qui la ſçachent : car comme vous le pouuez imaginer, ma fuite fera vn aſſez grand bruit dans la Ville, lors qu’ils y arriueront, pour en entendre parler, de quelque condition qu’ils ſoient. Ainſi quand meſme ces Gens là ne me connoiſtroient pas, ils ne laiſſeroient pas de dire qu’ils ont trouué deux hommes ſuiuis de deux Eſclaues & d’vn Guide. Il eſt vray, dit Celere, que cela pourroit arriuer : mais ſi nous nous détournons par ce petit ſentier, nous nous ferons plus remarquer par ces Gens qui viennent, que ſi nous ſuiuions noſtre chemin : car comme vous le voyez, il eſt ſi peu frequenté, qu’il leur ſera aiſé de voir que nous ne le prenons que pour ne les rencontrer pas : de ſorte qu’Aronce voyant en effet quelque danger