Page:Madeleine de Scudéry - Clélie, histoire romaine - Volume 02.pdf/163

conte ; & qu’elle l’en remercieroit ; il euſt preſques voulu auoir encore ſacrifié dauantage à ſon amour. Il luy ſembloit meſme, tant ſa paſſion le flattoit, que Clelie deuoit deuiner ce qu’il faiſoit pour elle : ſi bien que marchant auec vne diligence incroyable de peur d’eſtre ſuiuy, & marchant ſans trouuer perſonne, Aronce eut loiſir d’entretenir tout ſeul ſa paſſion, car il n’y auoit pas moyen de faire de longs diſcours en allant ſi viſte. Mais comme la fin de la nuit aprocha, l’obſcurité redoublant ſuiuant la couſtume, il falut qu’il marchaſt vn peu plus lentement iuſques à ce que les Nuës commençant à blanchir du coſté de l’Orient, donnerent à toute la Campagne cette agreable lumiere, qui en diſſipant imperceptiblement les Tenebres, ſemble redonner la vie à toutes les beautez de la Nature. Comme il n’y auoit