Page:Madeleine de Scudéry - Clélie, histoire romaine - Volume 02.pdf/154

alors ennemies de Rome, pour taſcher de ſçauoir ſi Horace comme ennemy de Tarquin, ne s’y ſeroit point retiré, vint luy aprendre qu’il eſtoit à Ardée ; que Clelie y eſtoit auſſi ; & qu’elle y eſtoit malade d’vne maladie languiſſante. De ſorte qu’il ſe trouua dans vn embarras eſtrange : car le bruit eſtant que Tarquin alloit aſſieger Ardée, il ne ſçauoit quelle reſolution prendre. De dire au Roy ſon Pere quelle eſtoit ſa paſſion pour Clelie il n’y auoit pas d’aparence : parce que dés qu’il auoit été remonté ſur le Thrône, le Roy de Rome, qui vouloit s’aſſurer d’vn voiſin ſi puiſſant, auoit enuoyé des Ambaſſadeurs vers luy pour renouueller l’Alliance qui auoit eſté depuis quelque temps entre ces deux Eſtats : & en effet le Roy de Cluſium, qui voyoit que Rome eſtoit la plus puiſſante ville de toute l’Italie, & qu’il n’y auoit plus que Vol-