Page:Madeleine de Scudéry - Clélie, histoire romaine - Volume 02.pdf/153

commencer le ſiege d’Ardée, dont on parloit alors diuerſement par toute l’Italie. Mais durant que chacun ſuiuant ſon humeur s’entretenoit de Guerre ou d’Amour, Aronce, le malheureux Aronce, au milieu de tant de felicitez apparentes, s’eſtimoit le plus infortuné de tous les hommes : car il n’auoit iamais eu plus d’amour pour Clelie qu’il en auoit alors, & il ne s’eſtoit iamais veû auec ſi peu d’eſperance. Si bien que toute ſa conſolation eſtoit de parler de ſon malheur auec la Princeſſe des Leontins, & auec Celere, qui ſçauoient ſeuls quelle eſtoit ſa paſſion pour cette admirable Romaine. Il s’imaginoit que s’il euſt pû ſçauoir ſeulement où eſtoit Clelie, il euſt ſenty vn ſoulagement fort grand : mais il eſprouua bien toſt le contraire : car vn de ceux qu’il auoit enuoyé dans toutes les villes d’Italie, qui eſtoient