Page:Madeleine de Scudéry - Clélie, histoire romaine - Volume 02.pdf/15

ſur l’eſtat preſent des choſes. Mais à la fin les Amis de Porſenna qu’on attendoit eſtant arriuez, Sicanus les preſenta à Aronce : apres que Nicius & Martia leur eurent apris toutes les choſes qui leur pouuoient faire voir auec certitude, qu’il eſtoit effectiuement Fils de Porſenna. Si bien que regardant alors l’eſtat des affaires, il y eut vne aſſez grande conteſtation entre eux : car il y en auoit qui diſoient qu’on ne pouuoit trop toſt faire connoiſtre Aronce & Mezence, apres le ſeruice qu’il luy auoit rendu : mais pour Sicanus, il diſoit au contraire qu’on ne le pouuoit faire ſans expoſer Aronce : & que pour agir prudemment, il faloit attendre que le Prince de Perouſe l’aimaſt pour ſon propre merite : & qu’il eſtoit meſme à propos de ne le faire pas connoiſtre, qu’ils ne fuſſent en eſtat de ſe pouuoir oppoſer à Me-