Page:Madeleine de Scudéry - Clélie, histoire romaine - Volume 02.pdf/149

& pour voir Aronce, ce dernier aprit à Porſenna que c’eſtoit principalement à la Princeſſe des Leontins à qui il deuoit toutes choſes : & qu’il n’y auoit pas d’aparence de ſortir de Perouſe ſans ſçauoir ſi elle n’en vouloit pas auſſi partir. De ſorte que quelque preſſé qu’il fuſt, il entra chez elle, pour la remercier des obligations que luy auoit Aronce : pendant quoy Galerite qui eſtoit dans ſon Chariot, diſoit au Peuple qu’il obeïſt à Mezence ; qu’il oubliaſt la rigueur qu’il auoit euë pour elle ; & qu’il demeuraſt dans ſon deuoir. Mais durant qu’elle parloit auec tant de generoſité & de prudence, la Princeſſe des Leontins reçeuoit Porſenna, qu’elle ſuplia de vouloir luy donner vn Aſile aupres de la Reine ſa Femme : ne iugeant pas qu’elle pûſt en trouuer vn aſſuré aupres de Mezence, apres ce qu’elle