Page:Madeleine de Scudéry - Clélie, histoire romaine - Volume 02.pdf/147

l’ay deſia dit : & luy auoit aidé à executer vn deſſein qui auoit ſi bien reüſſi. Mais afin qu’il n’y euſt plus rien à eſclaircir à la reconnoiſſance d’Aronce, Flauie & ſon Mary, demanderent à entrer, & entrerent : car ce n’eſtoit pas vn temps à obſeruer regulierement les formes. Nicius & Martia, qui venoient d’arriuer à Perouſe, vinrent auſſi : & amenerent de plus vn homme que Clelius enuoyoit à Aronce : par qui il luy faiſoit aporter le meſme Berçeau dans quoy il auoit eſté trouué flottant ſur la Mer, apres que Nicius auoit fait naufrage. De ſorte que ne manquant plus rien à la reconnoiſſance d’Aronce, & Porſenna agiſſant auec vne generoſité qui n’eut iamais d’eſgale ; Mezence fut ſi touché de repentir, qu’il voulut laiſſer la conduite de ſon Eſtat à celuy à qui il deuoit la vie : mais comme Porſenna eſtoit eſgalle-