Page:Madeleine de Scudéry - Clélie, histoire romaine - Volume 02.pdf/146

ce qui ſe paſſoit au Palais de Mezence entre Aronce, Galerite, & luy : ſi bien que changeant encore de deſſein, ils furent au deuant de Porſenna, à qui ils conſeillerent d’aller droit au Palais du Prince de Perouſe. De ſorte que ce Roy qui eſtoit vn Prince à qui la Priſon n’auoit pas oſté la bonne mine & la Maieſté, marchant dans les Ruës de cette ville, ſuiuy de ces quatre cens Cheuaux, & de tous les Amis d’Aronce & des ſiens, qui n’eſtoient pas en petit nombre, fit aiſément prendre au Peuple les ſentimens qu’il voulut. Car il ſalüoit ciuilement, & diſoit, & ceux qui le ſuiuaient auſſi, qu’il ne demandoit que la liberté de Galerite : ce Prince adiouſtant qu’Aronce eſtoit ſon Fils : & que Mezence l’ayant ſçeu, vouloit le faire mourir. De ſorte que le Peuple ſe rangeant aupres de luy, l’auoit ſuiuy au Palais de Mezence, comme ie