Page:Madeleine de Scudéry - Clélie, histoire romaine - Volume 02.pdf/133

choſe, & iuſques à ce qu’elle ſçeuſt auſſi l’eſtat où eſtoit Porſenna. Cependant comme il y auoit quelques Amis particuliers d’Aronce dans la Chambre de Mezence, ils entendirent que ce Prince parloit auec colere : & celuy qui gardoit la Porte (& qui auoit de l’obligation à Aronce) entendant meſme les menaces que luy faiſoit Mezence, fut en aduertir diligemment les Amis d’Aronce, qui le furent dire à ceux qui eſtoient chez la Princeſſe des Leontins : qui de leur coſté ſongerent à ce qu’ils pourroient faire pour ce Prince, qui ſe trouuoit dans vn embarras inconceuable. Il ne laiſſa pourtant pas, malgré cette confuſion, de ſonger à Clelie : & de craindre que Mezence le faiſant arreſter, ne luy oſtaſt les moyens de la tirer des mains d’Horace. De plus il ne ſçauoit ſi le Roy ſon Pere eſtoit mort ou viuant : il voyoit la Reine ſa Mere en vn pitoyable eſtat