que parlant alors auec beaucoup d’action, il montra la main où eſtoit la marque qui eſtoit ſemblable à celle que Galerite auoit ſur le viſage : ſi bien que l’ayant veuë, elle leur fit voir clairement qu’Aronce ne mentoit pas. Cependant au lieu que cette reconnoiſſance deuoit produire vn fauorable effet, elle irrita encore Mezence : qui ne ſçachant ce qu’il deuoit vouloir ou ne vouloir pas ; & ne ſçachant pas non plus ſi les ordres qu’il auoit donnez de faire mourir Porſenna, en cas qu’il ne conſentiſt point à la rupture de ſon Mariage, auroient eſté executez ; il dit les choſes du monde les plus dures, & à Galerite, & à Aronce, quoy qu’il euſt pour ce Prince vne fort grande tendreſſe. D’ailleurs quelque ſatiſfaction qu’euſt Galerite d’auoir retrouué ſon Fils, elle n’oſoit pourtant s’en réiouïr, iuſques à ce qu’elle ſçeuſt plus preciſément la
Page:Madeleine de Scudéry - Clélie, histoire romaine - Volume 02.pdf/132
Le texte de cette page a été corrigé et est conforme au fac-similé.
