Page:Madeleine de Scudéry - Clélie, histoire romaine - Volume 02.pdf/124

zence, mais il ne le voulut pas : & il fut en effet trouuer ce Prince, qui ne le vit pas pluſtoſt qu’il le reçeut auec vne demonſtration de ioye extraordinaire. Sextilie eſtoit alors aueque luy, qui le reçeut auſſi auec plus de teſmoignages d’amitié qu’elle n’auoit iamais fait : apres quoy Mezence prenant la parole, iuſques à cette heure, dit-il à Aronce, ie n’ay fait autre choſe que vous auoir des obligations : & des obligations d’vn prix ſi conſiderable, qu’on ne les peut reconnoiſtre dignement. Car enfin vous m’auez ſauué deux fois la vie ; vous m’auez fait vaincre mes Ennemis ; & vous m’auez conſerué mon Eſtat par cette victoire, ſans que i’aye encore rien fait pour vous. Mais ſi vous auez eſté quelque temps ſans receuoir des marques de ma reconnoiſſance, adiouſta-t’il, ie veux que vous en receuiez auiourd’huy de ſi grandes, que