Page:Madeleine de Scudéry - Clélie, histoire romaine - Volume 02.pdf/123

reſolut de precipiter les choſes, de peur de quelque ſouleuement. Pour cét effet, il enuoya ſecrettement ſes ordres où Porſenna eſtoit gardé : & il enuoya querir Aronce, auec vn commandement ſi exprés d’aller le trouuer promptement, qu’il eut lieu de penſer qu’on le demandoit pour quelque choſe d’extraordinaire. Il fut meſme aduerty par quelques vns de ceux qui eſtoient de ſon intelligence aupres de Mezence, que ce Prince auoit enuoyé au lieu où l’on gardoit Porſenna : de ſorte que comme tous les Amis de ce Roy priſonnier eſtoient alors en eſtat d’entreprendre quelque choſe pour luy ; & que Nicius & Martia eſtoient arriuez à Perouſe ; Aronce leur manda par Celere ce qu’il ſçauoit, & leur ordonna de s’aſſembler chez la Princeſſe des Leontins, afin d’agir ſelon que l’occaſion le requerroit. Celere voulut l’empeſcher d’aller chez Me-