Page:Madeleine de Scudéry - Clélie, histoire romaine - Volume 02.pdf/122

donna ordre qu’on amenaſt la Princeſſe Galerite de l’Iſle d’où elle eſtoit gardée, & qu’on la logeaſt dans ſon Palais : ſans permettre pourtant à qui que ce fuſt de la voir ny de luy parler. La choſe s’executant donc ainſi, cette belle & vertueuſe Princeſſe, qui ne ſçauoit rien ny de ſon Mary, ny de ſon Fils, ny de la cauſe du changement qu’on aportoit à ſa priſon, ne pouuoit comprendre ſi elle deuoit craindre ou eſperer : mais ce qu’il y auoit de merueilleux, eſtoit qu’elle n’auoit preſques iamais eſté plus belle qu’elle eſtoit alors : & il n’y euſt eu perſonne qui euſt pû croire qu’elle euſt eu plus de vingt-cinq ans, ſi on n’euſt pas ſçeu qu’elle en auoit dauantage. Auſſi lors qu’elle arriua à Perouſe, il ſe fit vn ſi grand bruit parmy le Peuple, de l’iniuſtice que Mezence auoit de retenir vne ſi belle Princeſſe priſonniere, que ce Prince ſe