Page:Madeleine de Scudéry - Clélie, histoire romaine - Volume 02.pdf/120

qu’auoit Mezence il offriroit Galerite à tout ce qu’il y auoit de Gens de qualité dans ſa Cour, il employa Aurelie & Sicanus (qui eſtoit venu à Perouſe) à taſcher de leur diſſuader vne choſe qui leur pourroit eſtre fort nuiſible, quoy qu’elle leur paruſt fort auantageuſe. Mais pour le pouuoir mieux faire, Sicanus & Aurelie leur diſoient confidemment, qu’ils ſçauoient que le Fils de Porſenna n’eſtoit point Priſonnier de Mezence, comme le bruit en auoit couru, & qu’il paroiſtroit aſſurément bien toſt : adiouſtant la honte qu’il y auroit pour celuy qui conſentiroit à vne propoſition ſi iniuſte : & la choſe fut enfin conduite auec tant d’adreſſe & tant de bonheur, qu’apres que Tiberinus eut rendu ſa reſponce ſelon l’intention de la Princeſſe des Leontins, Mezence en attendant celle de Sextilie, fit preſſentir les ſentimens de tous ceux à qui vray ſemblablement il pouuoit ſon-