Page:Madeleine de Scudéry - Clélie, histoire romaine - Volume 02.pdf/119

il ne balança plus ſur ce qu’il deuoit faire : & il fit mille proteſtations à cette Princeſſe qu’il n’auoit pas heſité vn moment ſur la reſolution qu’il deuoit prendre. Que ce n’auoit pourtant pas eſté par les conſiderations qu’elle luy faiſoit faire : mais ſeulement parce qu’il ne pouuoit regner ſans la perdre. La Princeſſe des Leontins qui vouloit qu’il demeuraſt dans les ſentimens où il eſtoit, feignit de luy en eſtre obligée : & ſans s’engager à rien, Tiberinus partit d’aupres d’elle reſolu de refuſer Galerite. Et en effet il fut retrouuer celuy qui deuoit rendre conte de ſes ſentimens à Mezence, pour luy dire qu’il n’auoit garde de ſonger à accepter l’honneur qu’on luy offroit : luy diſant en ſuite tout ce que la Princeſſe des Leontins luy auoit dit, pour l’empeſcher d’y penſer. Cependant comme Aronce iugea bien que dans l’opiniaſtre deſſein