Page:Madeleine de Scudéry - Clélie, histoire romaine - Volume 02.pdf/118

eſtant qu’il y auoit vn Fils de Porſenna en quelque endroit du Monde, il y auoit apparence qu’il ne le laiſſeroit iamais regner en repos : & qu’à la premiere occaſion, les ſuiets de Porſenna ſe reuolteroient, & le liureroient peut-eſtre au Fils de ce Roy, comme le Meurtrier de ſon Pere : & qu’ainſi elle trouuoit qu’il ſeroit beaucoup plus beau de refuſer vne choſe qui n’auoit qu’vne ſimple apparence de Grandeur : adiouſtant qu’il luy ſeroit impoſſible d’eſtimer iamais vn homme qui ſe reſoudroit d’eſpouſer Galerite. Tiberinus entendant donc parler la Princeſſe des Leontins de cette ſorte, creût qu’elle ne pouuoit luy donner de plus fortes eſperances, qu’en luy conſeillant de refuſer ce qu’on luy propoſoit : ſi bien que ſon amour deuenant encore plus violent par cette nouuelle eſperance,