Page:Madeleine de Scudéry - Clélie, histoire romaine - Volume 02.pdf/113

diſoit-il, les Priſonniers de ſa condition ne doiuent pas eſtre traitez comme les autres : & l’on ne les doit iamais deliurer qu’on ne les ait mis en eſtat de ne ſe pouuoir vanger de leur Priſon. Aronce reſpondit à cela tout ce que ſon grand eſprit luy ſuggera : & il ſçeut ſi bien meſnager celuy de Mezence, qu’il luy promit de ne precipiter point la mort de Porſenna. Mais quant au Mariage de ma Fille (pourſuiuit-il apres pluſieurs autres choſes) i’y vay ſonger comme ſi Porſenna eſtoit deſia mort : car s’il ne conſent pas que le ſien ſoit rompu, il mourra : & s’il y conſent, il eſt temps que ie penſe à qui ie veux donner Galerite. Et en effet, Mezence mit ce deſſein là ſi opiniaſtrément dans ſa teſte, qu’il ne ſongea plus qu’à l’executer, & qu’à reſoudre qui il vouloit que Galerite eſpouſaſt : Comme Sextilie auoit touſiours eu