Page:Madeleine de Scudéry - Clélie, histoire romaine - Volume 02.pdf/112

eſtoit perſuadé qu’il ne luy ſeroit peut-eſtre pas impoſſible de le porter à conſentir que ſon Mariage fuſt rompu, pourueû qu’on ne precipitaſt point les choſes. Aronce ne quita pourtant le Roy ſon Pere qu’apres luy auoir aſſuré qu’il mourroit plus toſt que de conſentir qu’il mouruſt : & qu’apres luy auoir donné toutes les marques de vertu & de generoſité qu’il luy pouuoit donner en l’eſtat où il eſtoit. Cependant il dit à Mezence à ſon retour, ce qu’il auoit reſolu de luy dire : mais quoy que le Prince de Perouſe euſt pluſtoſt ſouhaité que Porſenna euſt eſté conuaincu de l’aſſaſſinat qu’il luy imputoit, que d’en eſtre iuſtifié, il n’oſa pas le teſmoigner : & il ſe contenta de dire ſeulement à Aronce, que quand Porſenna conſentiroit que ſon Mariage fuſt rompu, il ne luy donneroit la liberté de long temps : car enfin,