ſa reconnoiſſance ; & toutes les marques qui l’auoient confirmée à ces deux Perſonnes : & generalement tout ce qui pouuoit ſeruir à luy faire voir auec certitude qu’il eſtoit ſon Fils, & qu’il eſtoit meſme digne de l’eſtre. Car il luy raconta le deſſein qu’il auoit fait de venir aupres de Mezence pour le deliurer ; comment il auoit ſauué la vie de ce Prince dans vn Bois qui eſtoit alors aupres du Lac de Thraſimene ; & tout ce qui luy eſtoit arriué depuis ; mais il ne luy parla pas de ſon amour pour Clelie. Au contraire, quoy qu’il ſemblaſt qu’il ne pûſt preſques raconter ce qu’il luy eſtoit arriué ſans la nommer, il l’eſuita ſoigneuſement : luy ſemblant que s’il prononçoit le nom de cette admirable Fille, il deſcouuriroit quelque choſe des ſentimens qu’il auoit dans l’ame. Mais apres auoir dit à Porſenna mille circonſtances
Page:Madeleine de Scudéry - Clélie, histoire romaine - Volume 02.pdf/108
Le texte de cette page a été corrigé et est conforme au fac-similé.
